笑話三則

可愛醒目的小妹妹今天last day了，公司上下都很捨不得她，連同學們都又送禮物又買點心，以答謝她一直的幫忙。小妹妹，祝你工作順利，去到邊都咁多人錫！

另一邊廂，同事日日都為小事勞氣，「嘔血咁滯」。

同事正為老闆安排與重要客人會面。
同事：「你幫我睇吓，x月x日下晝兩點至四點，TVB有無book到房？」
新同事：「兩點至四點，無……但一點半到四點半，有。」
同事：「咁有無寫係TVB丫？」
新同事：「有。」
同事：「book咗幾號房？」
新同事：「3號。」
老闆覺得3號房太細，想轉為LR。
同事：「LR兩點至四點有無人用？」
新同事：「兩點至四點，無……但兩點半至五點，有堂上。」
因為在老闆面前，同事忍住笑。
同事：「咁你同我掉去LR，將上堂掉去LH啦。」
新同事：「唔得！未問過教書個同事喎！」
同事：「得架啦，你同我掉房啦！」
新同事：「未問過教書個同事，唔得架喎！」
同事開始不耐煩：「你即刻同我掉房！」
新同事：「……」

公司有課程正在招生，申請者經初步篩選後，需參加面試。
同事請新同事篩走沒相關學歷或工作經驗的申請者，因為是個有關治療輔導的課程，相關學歷包括社會科學如心理學、社會工作、輔導等，相關工作包括社會工作者、教師、輔導員、精神科醫生或護士等。新同事拿著一大疊有問題申請人的申請表，向同事匯報結果。
新同事：「呢個個first degree唔係喎！」
同事一看：「佢係master in counseling喎！」
新同事：「但佢個first degree唔關事喎！」
同事：「咁你話係bachelor大，定係master大啲丫？」
新同事：「……」
新同事翻出另一張申請表：「呢個啲degree完全唔關事！」
同事一看：「佢做social worker／教書架喎！」

同事問新同事總申請人數，準備向高層報告申請情況。
同事：「而家有幾多人申請？」
新同事：「十八……唔係，十九至啱。但呢個未交齊嘢喎……」
同事：「我唔理，總之我要知總共有幾多人申請，唔理佢交齊嘢未！」
第二日。
同事：「而家有幾多人申請？」
新同事：「廿八……唔係，三十至啱。」
同事：「咁你有無計陳醫生？李生呢？」
新同事：「係喎……但果個星期三唔得，呢個又話一定要禮拜六喎……」
同事：「你出去同我乜都唔好理，總之將同名的就用夾夾埋一齊，然後數吓有幾多個夾入嚟話返俾我知！」
一會。
同事：「總共有幾多個夾呀？」
同事後話：「報個人數都要搞三日先數得掂……唉……」

同事結語：「唔激死咪笑死囉！」