職場無奇不有 – 新一代

又有些人奉行「你幫我係應份，我幫你就笨」的精神，只會搵你幫手，但你開到口都唔會幫番你手。總之就剩係睇住自己嗰瓣，自己d嘢係嘢，人地d嘢就唔係嘢。

問都唔問你得唔得閒就編d non-office-hour duty俾你，直接email話enlist your help順手cc埋俾你阿頭，就當你應承咗。但到臨開波你問佢單嘢究竟點搞，佢自己原來都未諗掂。Coordinate成個office送禮俾人，居然話 用包過poster/foam board拆爛咗的蠟紙包，仲要放響信房等人地自己過嚟囉，送禮噃，俾d誠意好掛，你估人地真係好恨收你份禮咩。每年咁多project有嘢送出去，咪又 係同事coordinate好一次過送，今次公司附近的禮同事都自己by hand送咗過去啦，剩番的都跟唔掂送唔掂，就真係幫唔到囉。

又有練精學懶的夠膽死帶個guest去marked seat，帶到最後一行都未到（都有起碼十幾廿行位的），就指個guest自己去第一行個位，見都未見到個位呀，唔怪得個guest忟啦，好心行多幾步都 唔怕死啦。預咗夜晚要幫手做event，話唔舒服上晝請假，到下晝都唔見人，唔追到都唔話返唔到，但唔舒服又可以不停講五分鐘話自己點唔舒服，之後仲補咗 個大半頁的email幾大段字話自己作感冒，而作感冒係最易傳染俾人嘅，所以唔返工，請注意，係作感冒！隔一日，又居然夠膽重施故技，打電話返公司話唔舒 服上晝請病假，下晝又係無聲無息唔見人噃。會唔會揚咗d呢？唔通以為返咗工唔夠一個禮拜，就其他同事唔為意佢無出現？